पयां कि डाळी मा घुघूती
घुघूती बसुती गाणी छ
डिंडळी मा बैठि ती घिंडुड़ी
घिंण्डवा मा छ्विं लगाणी छ
कांव-कांव कैरिकी कागा
झणि कैथे बुलाणूं छ
मिट्ठू-मिट्ठू बोलिकि तोता
लाल मिर्च बुखाणू छ
सिटलूं को किकलाट मच्यूं
झणि क्यांकि पंचैत करणा छन
कठफ्वड़्या ब्वाडा ठक्क-ठक्क कैकी
डाळ्यों तै कच्याणा छन
सर्गदिदा पाणि-पाणि बोलिकि
चोळी धै लगाणी छ
घैंणि डाळिमा बैठिकि हिलांसी
खुदेड़ गीत सुणाणी छ
कथगा स्वाणू लगणूं छ यूं
सब्बि चखल्यूं तैं देखिकि आज
मेरु बि ज्यू ब्वनू छ दगड़्यों
मी बि चखुलु बणिजौं आज
No comments:
Post a Comment